काठमाडौं। भारतीय संगीत संसारकी स्वर किन्नरी सुरोंकी मल्लिका श्रेया घोषालको मुम्बईको वर्लीमा नयाँ घर किनेको खबरले यतिबेला चर्चाको चुलि छोएको छ। उनका पुराना घरहरूको कुरा गर्ने हो भने, करोडौंको सम्पत्ति भए तापनि श्रेयाको घरको सजावटमा सादगी र आधुनिकताको एउटा सुन्दर सङ्गम देख्न सकिन्छ। यदि तपाईं पनि आफ्नो घरलाई विलासी र शान्त बनाउन चाहनुहुन्छ भने, श्रेयाको घरका केही विशेष कुनाहरूबाट सजावटका आइडिया लिन सक्नुहुन्छ।

आफ्नो स्वरले करोडौंको मन जित्न सफल श्रेया घोषाल विलासी जीवनशैली बिताउँछिन्। उनको अनुमानित सम्पत्ति २४० करोड भारु रहेको बताईन्छ। हालै उनले मुम्बईको वर्ली जस्तो महँगो क्षेत्रमा नयाँ घर किनेकी छन्। मुम्बई र कोलकातामा उनका पहिले नै भव्य घरहरू छन्।

घरको सजावटको कुरा गर्दा कोलकातादेखि मुम्बईसम्म, उनका घरहरूमा परम्परागत कला र आधुनिक इन्टेरियरको उत्कृष्ट तालमेल पाइन्छ। बैठक कोठामा राखिएको विन्टेज हार्मोनियम होस् वा बालकनीको सुन्दर अर्बन जङ्गल, घरको हरेक कुनाले एउटा छुट्टै कथा भन्छ।

हल्का रङका काठका ढोकाहरू

श्रेया घोषालको घरका ढोकाहरू उनको स्वभाव जस्तै सरल र शालीन छन्। हल्का रङका काठका ढोकाले घरलाई शान्त र क्लासी लुक दिएका छन्। यसको ह्यान्डल पनि साधारण र आधुनिक छ। सिसाका प्यानल र त्यसको वरिपरि प्रयोग गरिएको हल्का काठले घरमा प्राकृतिक उज्यालो आउन दिन्छ र घरलाई हावादार बनाउँछ।

भित्तामा सेतो रङको थ्रि-डी आर्ट वर्क

घरभित्र छिर्ने बित्तिकै भगवानका लागि बनाइएको एउटा सुन्दर कुना देखिन्छ। यहाँका भित्तामा सेतो रङको थ्रि-डी आर्ट वर्क छ, जसले भगवान गणेशको ढुङ्गाको प्रतिमालाई भव्य देखाएको छ। प्रतिमाको वरिपरि राखिएका ताजा सयपत्रीका फूल र सफा सेतो तख्ताले यो ठाउँलाई पवित्र बनाएको छ। यहाँ आधुनिक र परम्परागत सजावटको तालमेल स्पष्ट देखिन्छ।

काठको काम र हल्का रङको प्रयोग

यो कुनामा काठको बुट्टा र हल्का रङहरूको सुन्दर प्रयोग गरिएको छ, जसले घरलाई न्यानो आभास दिन्छ। भित्तामा झुण्ड्याइएको ठूलो सुनौलो घडी र ताजा फूलका गुच्छाले यसको सुन्दरता अझ बढाएको छ। घरभित्र राखिने बिरुवाले ताजगी थपेका छन् भने बुद्धको मूर्ति भएको कुनाले मनमा शान्ति र आनन्द प्रदान गर्छ।

बैठक कोठाको भव्य सजावट

श्रेयाको बैठक कोठामा आधुनिक फर्निचर र शास्त्रीय वाद्ययन्त्रको मिश्रण छ। यहाँ राखिएको टील ग्रीन रङको विन्टेज विङ चेयरले कोठालाई शाही लुक दिएको छ। मार्बल टप भएको डाइनिंग टेबल र न्युट्रल रङका सोफाले यसलाई आधुनिक बनाएका छन्। पुरानो हार्मोनियमले यो घर कुनै कलाकारको हो भन्ने प्रष्ट पार्छ।

श्रेया घोषालको सुत्ने कोठा 
 
श्रेयाको बेडरुमको हेडबोर्ड गाढा हरियो रङको छ, जसले कोठालाई लक्जरी फिल दिन्छ। रङ्गीबिरङ्गी कुसन र फ्लोरल प्रिन्ट भएका सिरानीहरूले सेतो तन्नासँग मिलेर कोठालाई रमाइलो बनाएका छन्। यो कुना सुत्नका लागि मात्र नभई आराम गर्न र काम गर्न पनि उत्तिकै सहज देखिन्छ।

स्टुडियोको इन्टेरियर

श्रेयाको स्टुडियो र डाइनिंग एरियाको इन्टेरियर आधुनिक र सिर्जनशील छ। छतमा साउन्ड-प्रुफिङका लागि गरिएको टेक्सचर र ट्रयाक लाइटिङले यसलाई व्यावसायिक वर्कस्पेसको लुक्स दिएको छ। भित्तामा झुण्डिएका ठूला पेन्टिङ र फूलका सजावटले कोठाको आकर्षण बढाएका छन्।

घरको बाहिरी भाग  

घरको बाहिरी भाग निकै विलासी र आरामदायी छ। यहाँ भुइँमा कालो र सेतो रङको चेकर प्याटर्नका टायलहरू छन्, जसले विन्टेज लुक्स दिन्छ। पौडी पोखरी र वरिपरि लगाइएका ताडका रुखले कुनै रिसोर्टको आभास दिलाउँछन्। यहाँ साँझको चिया पिउनका लागि विकर फर्निचर राखिएको छ।

चाडपर्वमा रंगोली

चाडपर्वका बेला श्रेयाको घर परम्परागत सादगीले भरिन्छ। भुइँमा बनाइएको ताजा फूलको रंगोलीले घरको सौन्दर्यमा चार चाँद लगाउँछ। सयपत्री र गुलाबका पत्रहरूबाट बनाइएको रंगोली र त्यसको बीचमा बालिएका दियोले घरको वातावरणलाई सुगन्धित र उज्यालो बनाउँछन्।

प्रकृति र हरियालीको प्रेम

यो कुनाले श्रेयाको प्रकृतिप्रतिको प्रेम झल्काउँछ। सानो अपार्टमेन्टका लागि उनको भर्टिकल गार्डन एउटा राम्रो आइडिया हुन सक्छ। काठ र फलामको फ्रेममा मनी प्लान्ट र जेड प्लान्ट जस्ता बिरुवाहरू सजाइएका छन्, जसले घरको हावालाई शुद्ध राख्नुका साथै आँखालाई पनि आराम दिन्छन्।

सुन्दर बालकनी

श्रेयाको बालकनी कुनै अर्बन जङ्गल भन्दा कम छैन। सहरको भागदौडबीच उनले बालकनीमा थुप्रै बिरुवाहरू लगाएर यसलाई शान्त ठाउँ बनाएकी छन्। काठको टेक्सचर भएको भुइँ र खुल्ला रेलिङबाट देखिने सहरको दृश्यले यस ठाउँलाई अझ मनमोहक बनाएको छ। (नवभारत टाईम्सबाट)